“Kepiye pakumpulan-pakumpulan rakyat sing nembe ngadhepi perampasan panggonan urip ngerteni lakon kapital, negesna musuh bersama, nguatna bebrayan, uga nempuh dalan mandiri anggone ngelawan gusuran”

Katon serupa galeri seni khas pedesaan, Omah Tombo Ati uwis puluhan tahun dadi sumber panguripane Pak Ndut sakeluarga nalika ancaman gusuran teka Pemerintah Kabupaten Bantul lan Propinsi DI Yogyakarta terus nrawasi. Empune Omah Tombo Ati kuwi anggota Aliansi Rakyat Menolak Penggusuran (ARMP). Bangunan saka kayu pring kuwi lumayan jembar. Ana ruang utama sing kebak pakaryan saka bathok klopo lan sapiturute, papat jedhing lan jamban, pawon, lan pirang-pirang bilik kamar sing disewakna kanggo lelungan pesisir segara kidul Parangkusumo, Kecamatan Parangtritis.

Suwene telung dina ing enteke sasi Mei kepungkur, Omah Tombo Ati dadi panggonan sinau bareng agraria pirang-pirang pakumpulan rakyat sing nembe ngadhepi ancaman gusuran. Ana Aliansi Rakyat Menolak Penggusuran (ARMP) sing dadi tuan rumah, Paguyuban Petani Lahan Pantai (PPLP) lan Wahana Tri Tunggal (WTT) teka pesisir kidul Kulon Progo, Forum Paguyuban Petani Kebumen Selatan (FPPKS), Forum Nelayan (Fornel) lan Paguyuban Masyarakat Balong (PMB) teka pesisir lor Jepara, Serikat Petani Blora Selatan (SPBS), Serikat Tani Indramayu (STI), lan Kelompok Tani Berdikari (KTB) teka Sumedang. Sekolah tani sing kaleksanan tanggal 27–29 Mei kuwi digerakna wadah pakumpulan-pakumpulan rakyat Forum Komunikasi Masyarakat Agraris (FKMA).

Sinau bareng agraria utawa sekoah tani kuwi kaleksanan sawise direncanakna FKMA nalika Kongres II sasi Februari tahun wingi ing Yogyakarta. Sekolah tani dianakake supaya pakumpulan rakyat isa pada crita langsung pengalamane anggone berjuang, isa luwih komplit ngerteni kasus sing diadepi, isa ngrancang cara-cara perlawanan sing manfaati, lan isa merajut bebrayan utawa solidaritas. Tujuan-tujuan kuwi pancen dicocokno karo semangat sing ndadekna FKMA, yaiku kemandirian pakumpulan rakyat sing nolak kompromi utawa win-win solution karo musuh.

Sekoah tani uga ora dibiayai karo lembaga bantuan endi wae. Sekabehe biaya diklumpukna dhewe karo relawan FKMA lan pakumpulan rakyat. Ana sing teka sumbangan solidaritas terbuka siji-siji uwong sing peduli kalian pakumpulan rakyat, ana sing teka hasil dodolan karya seni relawan FKMA.

Sinau bareng suwene telung dina kuwi dibagi dadi pirang-pirang sesi. Dina kapisan diisi penjelasan perkembangan kasus siji-sijine pakumpulan rakyat; diterusna sesi rembugan babagan Masterplan Percepatan dan Perluasan Pembangunan Ekonomi Indonesia (MP3EI). Dina kapindo giliran ARMP crita babagan Seni lan Perlawanan sing dadi pengalamane anggone ngelawan gusuran. Sawise ngobrol babagan Seni lan Perlawanan, sedulur teka nyang wilayahe PPLP-KP kanggo sinau babagan pasar lelang lombok. Dina ketelu diisi rembugan babagan koperasi sing digantha-gantha isa dadi wadah pakumpulan rakyat anggone ngelawan tatanan sing ora adil sing uwis merasuk jero ing panguripan sabendinane. Sawise kuwi, sinau bareng ditutup, sedulur ngumumna pernyataan sikap lan rencana kerja neng ngarepe atusan rakyat teka PPLP-KP, ARMP, lan WTT sing hadir.

Sinau bareng iki dianggep penting amerga perampasan panggongan urip rakyat kanggo proyek-proyek industri lan infrastruktur gedhe terus ngancam. Tuan rumah sekolah tani, ARMP, uwis pirang-pirang tahun ngadhepi ancaman gusuran teka Pemerintah Kabupaten Bantul lan Propinsi DI Yogyakarta sing arep bangun bisnis pariwisata gedhe. Rakyat ing pesisir kidul Kulon Progo sing gabung ana ing PPLP-KP, awit 2006 sampe saiki isih ngadhepi ancaman gusuran kanggo proyek tambang pasir wesi. Ora adoh teka kawasan PPLP-KP, rakyat patang desa ing kecamatan Temon, Kulon Progo sing gabung ana ing WTT perang urat syaraf karo proyek bandara anyar Yogyakarta. Sisih kulone, ing pesisir kidul Kebumen, petani sing gabung ana ing FPPKS terus ngadhepi perampasan lahan kanggo kawasan latihan tentara.

Teka pesisir lor Jawa, nelayan ana ing Jepara, Jawa Tengah, ngadhepi kejahatan perusahaan tambang pasir wesi lan proyek Pembangkit Listrik Tenaga Uap (PLTU). Pengurus Fornel Sugeng sing teka ing sekolah tani crita, nalika sibuk gugat perusahaan tambang pasir wesi PT Alam Mineral Lestari neng Pengadilan Tata Usaha Negara (PTUN), nelayan dirugekna karo proyek PLTU. Ora mung ngurangi wilayah golek iwak, proyek PLTU sing nekakna alat-alat berat liwat segara uga ganggu aktivitas nelayan. Ora adoh teka kawasan Fornel ing Desa Bandungharjo, Kec. Donoharjo iki, rakyat Desa Balong, Kec. Kembang, saiki ngadhepi tambang pasir wesi. Padahal rakyat ana ing desa kuwi durung suwe rada tenang sawise isa nolak proyek Pembangkit Listrik Tenaga Nuklir (PLTN).

Ana ing Blora, Jawa Tengah, petani sing gabung SPBS terus ngupayakna anggone ngelawan proyek pengeboran gas Blok Gundih PT Pertamina EP sing nyedot banyu kanggo injeksi teka Cekungan Randublatung. Rakyat ngelawan amerga Cekungan Randublatung kuwi ngono sumber irigasi pertanian rakyat.

Teka Indramayu, Jawa Barat, Said sing dadi anggota STI crita, petani neng kono ngadhepi peminggiran teka negara lan kaum pemodal lewat penguasaan lemah pengangonan. Lemah sing nalika jaman kerajaan kuwi dimanfaatna rakyat anggone angon ternak. Nalika jaman Orde Baru, lemah kuwi diduweni maneh karo negara lan disewakna lewat pelelangan. Nggaplekine, sing menang lelang para pengusaha lan birokrat sing nyewakna maneh lemahe. Akibate, regan sewa lemah mundak larang. Jarene Said, petani mung entuk bathi gedhene telung puluh ewu rupiah sabendinane teka tanduran pari, padahal bawon buruh tani isa sampe gedhene sekut ewu rupiah. Ora heran nek rakyat kepeksa milih mburuh ketimbang garap sawah.

Ngerteni Lakon Kapital, Negesna Musuh Bersama

Perkara-perkara gusuran lan peminggiran rakyat kuwi kesane pancen ora berhubungan. Musuh-musuh sing diadhepi uga saklemaran katon winates ana ing siji-sijine daerah pakumpulan rakyat. Yen siji-sijine pakumpulan rakyat kuwi njarwani laku perjuangane nganggo prinsip iki, penyatuan gerakan pakumpulan rakyat bakal ngadhepi dalan liku-liku. Mula saka kuwi, sinau bareng agraria ngrembug babagan lakon kapital kanggo ngerteni sapa tha sejatine sing marai perkara-perkara gusuran panggonan uripe rakyat.

Khusus kanggo ngrembug babagan lakon kapital iku, sedulur sinau karo Hendro Sangkoyo, pegiat Sekolah Demokratika Ekonomi (SDE). Ing jero kuliahe, Doktor jebolan Universitas Cornell Amerika sing akrab disapa Yoyok iki mbongkar tatanan MP3EI sing dadi rupa tatanan luwih gedhe sing diarani lakon kapital. Tatanan kuwi intine nglakokna usaha-usaha gedhe sing nganggo kedok pembangunan lan bukakna dalan jembar gusuran panggongan uripe rakyat. MP3EI ibarate nembe dadi ‘buku petunjuk’ pemerintah anggone nglakokna Rencana Jangka Panjang Pembangunan Nasional 2005–2025 sing temene ngutamakna industrialisasi lan pertumbuhan ekonomi, dudu ekonomi kerakyatan lan pemerataan. ‘Buku petunjuk’ iki mbagi wilayah Indonesia dadi enem kapling sing diarani koridor ekonomi kanggo wolu program utama ekonomi, yaiku pertanian, pertambangan, energi, industri, kelautan, pariwisata, telematika, lan pengembangan kawasan strategis. Ana 22 kegiatan ekonomi utama ing jerone, yaiku Peralatan Transportasi (perkakas kendaraan), Telematika (perkakas hubungan jarak jauh), Perkapalan (perkakas kapal), Tekstil (pakaian), Makanan-Minuman, Alutsista (perkakas perang tentara), Kelapa Sawit, Karet, Kakao, Peternakan, Perkayuan, Minyak dan Gas, Batubara, Nikel, Bauksit, Tembaga, Besi Baja, Perikanan, Pariwisata, Pertanian Pangan, Jabodetabek Area, dan Kawasan Strategis Nasional Selat Sunda.

Tabel Enam Koridor Ekonomi MP3EI

Koridor Ekonomi Sektor Industri Pusat Perekonomian Kegiatan Ekonomi
Sumatera Sentra Produksi dan Pengolahan Hasil Bumi dan Lumbung
Energi Nasional
Pangkal Pinang, Padang, Bandar Lampung, Bengkulu, Serang,
Banda Aceh, Medan, Pekanbaru, Jambi, Palembang, Tanjungpinang
Kelapa Sawit, Karet, Batu Bara, Perkapalan, Besi Baja,
Kawasan Strategis Nasional Selat Sunda
Jawa Pendorong Industri dan Jasa Nasional Jakarta, Bandung, Semarang, Yogyakarta, Surabaya Makanan-minuman, tekstil, peralatan transportasi,
perkapalan, telematika, alutsista, Jabodetabek Area
Kalimantan Pusat Produksi dan Pengolahan Hasil Tambang dan Lumbung
Energi Nasional
Pontianak, Palangkaraya, Banjarmasin, Samarinda

 

Minyak dan Gas, Batubara, Kelapa Sawit, Besi Baja,
Bauksit, dan Perkayuan
Sulawesi Pusat Produksi dan Pengolahan Hasil Pertanian, Perkebunan,
Perikanan, Migas dan Pertambangan Nasional
Palu, Gorontalo, Manado, Makassar, Kendari, Mamuju

 

Pertanian Pangan (padi, jagung, kedelai dan ubi kayu),
Kakao, Perikanan, Nikel, Minyak dan Gas Bumi
Bali-Nusa Tenggara Pintu Gerbang Pariwisata dan Pendukung Pangan Nasional Denpasar, Lombok, Kupang, Mataram

 

Pariwisata, Perikanan, Peternakan
Papua-Kepulauan Maluku Pusat Pengembangan Pangan, Perikanan, Energi dan
Pertambangan Nasional
Timika, Jayapura, Merauke, Sofifi, Ambon, Sorong,
Manokwari
Pertanian Pangan-MIFEE, Tembaga, Nikel, Minyak dan Gas
Bumi, Perikanan

Cilakane, program-program ekonomi kuwi ngutamakna model industri gedhe lan nganggo modal gedhe. Akibate, corak produksi utawa model kerja pertanian, perkebunan, lan perikanan cilik apa rumah tangga sing wis dilakoni wong-wong desa umume bakal kelibas. Wis dadi cerita umum, sajrone model ekonomi industri gedhe, lemah lan alat kerja liyane diduweni karo pemodal utawa pengusaha. Yen ambisi negara iki kaleksanan, bakal saya akeh apa sing diarani petani ora duweni lemah, nelayan ora duweni perahu, masyarakat agraris ora duweni karahayon agraria. Proyek industri pertanian pangan arupa Merauke Integrated Food and Energi for Estate (MIFEE) ing Papua wis kabukten ngrampas panggonan uripe rakyat. Lemah, alas, lan sapiturute sing wis dadi sumber panguripane rakyat neng kono saiki diduweni perusahaan-perusahaan gedhe. Rakyat kepeksa dadi buruh sing dibayar murah.

Teka rembugan iki, sedulur sinau bareng isa ngenali sejatine musuh bersama rakyat kuwi arupa tatanan gedhe ekonomi-politik sing dilakokna pengusaha lan penguasa. Tatanan iki mapan, dalan melakune rumit, digawe sajrone hubungan negara-negara sak ndonyo, nganggo pitungan bisnis sing njlimet, ngelibatna lembaga-lembaga keuangan arupa bank lan perdagangan saham, sarta diatur karo kebijakan-kebijakan sing digawe penggedhe-penggedhe politik. Nek wis ngerti nganakuwi, cara ngelawane ora cukup ngandalna unjuk rasa karo bengok-bengok “revolusi!” apa “hidup rakyat!”.

Banjur Yoyok ngomong yen dheweke seneng karo kegiatan FKMA arupa sinau bareng iki. Amerga neng kene wong-wong cilik isa nggenahna tatanan sing ora adil sing wis dirasakna, isa nelusuri lelakon-lelakon becik sajrone sejarah panguripan masyarakate, uga isa ngrancang cara-cara sing cetha lan mandiri kanggo nguculi uripe saka tatanan sing ora adil.

Semangat Bebrayan, Dalan Kemandirian

Dina kapindo giliran koordinator ARMP Mbah Watin nerangna pengalamane anggone ngelawan gusuran liwat kesenian. ARMP milih kesenian ora ucul saka sejarah panguripan masyarakat ing pesisir Parangkusumo. Biyen rakyat manggoni pesisir Parangkusumo amerga akeh uwong sing nglakoni ritual adat Jawa neng kana. Rakyat sekitar pesisir banjur nyediani ugarampene, nyuguhna kesenian-kesenian arupa gamelan, wayang, lan tari-tarian, sarta nyewakna kamar kanggo nginep. Sairing suwene jaman, lelakon ritual Jawa kuwi alon-alon ilang. Sing teka ing pesisir banjur lelungan biasa sing ngrasakna pesona elok alam pesisir. Rakyat sing manggon ing pesisir tetep bakulan panganan, buka warung, lan nyewakna kamar. Kesenian banjur dadi alat rakyat anggone ngelawan ancaman gusuran. Liwat kesenian, ARMP nglorke kritik marang penguasa lan pengusaha sing bakal ngusir rakyat lan nglakokna bisnis gedhe pariwisata.

Rampungan ngrembug babagan Seni lan Perlawanan, sedulur sekolah tani banjur teka nyang pesisir Kulon Progo, panggonane rakyat PPLP, kanggo ngangsu kawruh babagan pasar lelang lombok. Sawise tilik tanduran lombok, sedulur sekolah tani kumpul ing Gerbong Revolusi, omah sing dadi perpustakaan lan panggonan rapat PPLP. Diro, petani sing melu mandhegani pasar lelang tematha, crita sejarah lan tatanan pasar lelang. Pasar lelang lombok kuwi ngono dudu tatanan dol-tinuku lombok. Roh pasar lelang satemene ngono bebrayane petani.

Sadurunge ana pasar lelang, wayah petani nandur lombok ora barengan amerga duwe pitungan dhewe-dhewe. Lombok sing thukul ora bareng ndilalah ngundang hama merajalela. Pengalaman iki banjur nyadarna petani menawa tandur kudu barengan, sisan nerapna pitungan leluhur. Tandur bareng, panen uga bareng. Banjur tatanan pasar lelang diterapna kanggo ngedol kasil panen barengan.

Semangat bebrayan petani saya kuat amerga pasar lelang uga isa ngangkat ajining petani adhepan karo tengkulak. Sadurunge ana pasar lelang, tengkulak isa gampang nemtoake rega lombok sakarepe dhewe. Burhan, petani PPLP, crita yen biyen tengkulak malah kerep nyewa preman kanggo nggertak petani supaya gelem narima regan sing dikarepna tengkulak. Sawise ana pasar lelang, petani duweni kuasa nemtokake sapa-sapane tengkulak sing isa tuku lombok. Petani uga wani ndepak tengkulak sing bermasalah karo petani.

Kesimpulane, pasar lelang lombok sing diterapna petani PPLP kuwi ngono lakon bebrayan utawa guyub: nemtokake wayah tandur barengan, panen barengan, ngedol lombok barengan. Petani dadi kerep rembugan barengan kanthi rutin, mula nguatna pakumpulan PPLP anggone nolak tambang pasir wesi.

Ing dina kapindo iki sedulur sekolah tani sinau yen satemene ngono rakyat duweni lelakon-lelakon becik sing dadi alat anggone ngelawan ancaman gusuran lan tatanan sing ora adil. Nalika rakyat nyadari iki, mula pakumpulan rakyat satemene uga isa mandiri anggone ngelawan tanpa ngandalna sapa-sapane uwong liya.

Dina ketelu, sinau bareng banjur ngrembug babagan koperasi sing isa nguatna semangat bebrayan. Marsen S., pegiat pirang-pirang lembaga koperasi rakyat, sajrone rembugan jelasna, koperasi sing sejati kuwi ngono pakumpulan uwong, duik, lan kerja. Ora mung lembaga keuangan sing kondang karo kredit koyo sing mlaku umume.

Rembugan babagan koperasi iki uga ngelingna sedulur sekolah tani marang babagan lakon kapital sing wis dirembug sadurunge. Ora mung dadi wadah pendidikan politik rakyat, koperasi uga isa dadi kumpulan duik ‘teka lan kanggo’ anggotane dhewe mula isa ngindari rentenir lan bank. Kayadene wis dirembug, bank kuwi ngono salah sijine pelaku penting sajroning lakon kapital sing wis kabukten nindes rakyat. Sing ora kalah penting saka anane koperasi yaiku pakumpulan rakyat isa mbiyayai gawean-gaweane kanthi mandiri.

Rampung rembugan babagan koperasi, sedulur sinau bareng sepakat yen ilmu lan pengalaman teka sinau bareng iki penting kanggo sekabehane anggota siji-sijine pakumpulan rakyat. Mufakat iki saya nguatna rencana FKMA anggone nerusna kegiatan sinau bareng agraria ing siji-sijine pakumpulan rakyat sing nembe ngadhepi perampasan panggonan urip.